Matthew 9

Jiisuuꞌke Naning Doota Tamparuꞌantavuuꞌnaꞌ

(Mak 2:1-12; Luk 5:17-26)

1Teketa Jiisuuꞌ bakaning ninka bakaasi-koo aaꞌearira pakoꞌarira bakanooꞌ osi masipoꞌ tavoꞌariruꞌ. 2Teka niiꞌninge nantoonge naning doota tee-anko tavoꞌauꞌ batanang-koo bemparioꞌ. Eeꞌnoko tenang Jiisuuꞌke teing tee tavoꞌauꞌning biikaang baito oovura aaꞌpuuꞌ tee naning doota, “Domang mankiꞌdoaukaꞌ, ee aung, dakaning orarananka tontaꞌderonsing.” 3Teeꞌ nkovuko ooaara niiꞌninge boto naunukai biiꞌka kareaama aaꞌpaakoꞌ, “Aunge bakei naninge Kumponing bauvaupaaꞌumaang.” 4Teketa Jiisuuꞌke biikaang noruꞌ noruꞌura aaꞌpuruꞌ teing, “Diiꞌ aming-koo diikaang domang-koo kuunge teeꞌ munkururarimaang? 5Arera kara masikaꞌpoaruko ooverira ning makosi deeaung tammeripeuꞌ aaꞌning-koo eeꞌ minku-koo, ‘Dakaning orarananka tontaꞌderonsing,’ niiꞌnaꞌ eeꞌ minku-koo, ‘Daaꞌdarara naniai.’? 6Teka diiꞌke iroꞌ noruꞌkoo makosi ning Tee Naning-naumpoꞌ Paning-etaing tee tauraꞌ oꞌnong anke kansiꞌkoo oꞌnoi orarananka tontaꞌkoo makosi...” Teeꞌpura tee naning doota aaꞌpuuꞌ, “Daaꞌdarara dakaang taniꞌ nkavei naniai dakanava-koo.” 7Eeꞌnoko tee naning deto donkonura bakanava-koo beuꞌ. 8Eeꞌnoko ookara nantoong karingai ooaara tee aung karang kamaankiai datavorouꞌ. Eeꞌnoko teinge Kumponing daangampauꞌ tee temuriiꞌ tauraꞌ nantoong avuruꞌnung-koo.

Jiisuuꞌke Maatiuꞌ Bokuvuuꞌnaꞌ

(Mak 2:13-17; Luk 5:27-32)

9Eeꞌnoko teketa Jiisuuꞌke nanuma narung naning oovuuꞌ miring Maatiuꞌ, taakisi nkavaakoꞌnava-koo baꞌnanuioꞌ bakanavaro-koo. Teketa Jiisuuꞌke aaꞌpuuꞌ, “Ning siomeai.” Eeꞌnoko Maatiuꞌke deto donkonura tenang-eta deto tee siompui nanuuꞌnung. 10Teketa taamang nkovuuꞌnung-koo Jiisuuꞌ baꞌnanuuꞌ bakaning barevare-nupoong ninka eeꞌnoko nantoong mmauꞌ niiꞌning orenanka aaꞌning taakisi nkanuka porora baꞌnaniaara tee ninka nariꞌ taamanauꞌ teke Maatiuꞌ bakanava-koo. 11Eeꞌnoko teinge Boto Keperuuꞌnavitue teeꞌ ooaarira teing bakaning tee siompaakoꞌning niaꞌaarima aaꞌpauꞌ, “Diikaang pankaing aming-koo taakisi nkanuka ninka eeꞌnoko nantoong orenanka nariꞌ taamanaamaang?” 12Eeꞌnoko Jiisuuꞌke teeꞌ taaravura aaꞌpuuꞌ, “Teing nantoong tampaꞌ otoroining naninge nankaiꞌuriiꞌnaang piavoroaꞌ, teka teing siipavoromaing naing piavoromaung. 13Berira ioꞌ tee kara daari meekung-koong-koo tampaꞌ barerariaing aaꞌpumanaare,

‘Ninge tee aarumo piaa unaa-anta-poꞌnung piamoi oꞌnong, tee boontunang deeaꞌ.’
(Osea 6:6)

Aiꞌ ning nantoong tampenanka-anko moaꞌ. Ning orenanka-koo mouꞌnung nauaranko bereꞌariaꞌnaang.”

Jiisuuꞌ Unkumo-koo Niaꞌauꞌnaꞌ

(Mak 2:18-22; Luk 5:33-39)

14Napoꞌ Jooni bakaninge barevare-nupoonge porora Jiisuuꞌ niaꞌaama aaꞌpauꞌ, “Daꞌ dakaning daꞌ ninka nanirimaing arekeeꞌkoo dootuuꞌkoong aarumo siompai unkumuariaung? Eeꞌnoko niiꞌ Boto Keperuuꞌnavitu ninka unkumumarikooꞌ.” 15Eeꞌnoko Jiisuuꞌke makuꞌurima aaꞌpuruꞌ, “Teing nantoong baraneeꞌnavitu nampeesi-koo poromaing naning nampeesinara ninka nariꞌ otoroi arekeeꞌ napoꞌ orarunsiaripeuꞌ tee nampeesinara teke otoko? Batei tee otong tee naning nampeesinara teing-eta tontaꞌaravainaꞌmung, eeꞌnoko tenang teing doong-koo unkumoariaing. 16Naninge tee baarong nerakaraꞌ urikaraꞌ ninka naroꞌka pateꞌuarupeuꞌ, aiꞌ nerakaraꞌke teraꞌ urikaraꞌ beetoꞌuko dereꞌarara oraruꞌkupeuꞌ. 17Napoꞌ nantoonge nerakaruꞌ uaininaruꞌ urikaroꞌkoo pareꞌaavarupeuꞌ. Teeꞌ nkoaako deekoꞌ tee, teroꞌ nakaꞌarako teruꞌ uaininaruꞌ dakoarapeuꞌ eeꞌnoko teroꞌ tenang oraruꞌkupeuꞌ. Teruꞌ nerakaruꞌ uaininaruꞌ nerakaroꞌkoo deekoꞌ pareꞌkoo makosi, teeꞌkoo ookeng tampaꞌ otorepeuꞌ.”

Teni Neraiꞌnaꞌ Booꞌ Eeꞌnoko Napoꞌ Manikuma Siipa-poꞌnani Taarevoretuꞌnaꞌ

(Mak 5:22-43; Luk 8:41-56)

18Tenang teeꞌ minkuvuma teke otoko narung pava dootuuꞌnava tanatanuka-koong narung tavoꞌarara tee-koo uroꞌkanooꞌ kinkinui eentavarama aaꞌpuuꞌ, “Nnorang bakei enang okiꞌnaruuꞌkuing. Poraiꞌnange teni-koo bireng panteꞌeko teni domamparavai.” 19Teketa Jiisuuꞌ donkonura tee ninka nariꞌ beretuꞌ eeꞌnoko teing bakaning barevare-nupoong nariꞌ. 20Teketa tenang niiꞌnani naning manikuma kivora-ita kemareꞌka-koo tarumatearakoꞌnani tee-koo damaꞌdu pora bakaang mononopaꞌkoo kainuꞌ kompuuꞌ, eeꞌ noruꞌarara, “Bane okiꞌnooꞌ kompamira bakaang mononopaꞌkoo, ning teni taaremoainani.” 22Teketa Jiisuuꞌke bereꞌarara teni oovura aaꞌpuuꞌ, “Ani ee, daꞌ doturaravaing. Dakaang baitoi taareroinani.” Eeꞌnoko teni manikuma tenang eeꞌnang taarevouꞌ. 23Eeꞌnoko tenang tee Jiisuuꞌ tee naning pava dootuuꞌnava tanatanuka-koong bakanava-koo koinura nantoonge patuaiarima, biromparima naampavaako oovuruꞌ bakei karingai. 24Eeꞌnoko teie aaꞌpuruꞌ teing, “Oko sirariai, ani neraiꞌnaꞌ booaꞌ, teka tamung aatumaang.” Eeꞌnoko teinge benkempauꞌ tee. 25Teketa teing nantoong karinga damaꞌdu etuvurira teni neraiꞌnaꞌ otouꞌnavaro-koo tumparara teie bakaang bireng kompui deto iꞌampuko teni daaꞌaruꞌ. 26Eeꞌnoko tee-koong aung-koong doorenang tee ootukunairu-koo beremparuꞌnung.

Jiisuuꞌke Kaputuꞌka Bantang-antavureta Naning-koo Maꞌnaang Amako Bataꞌuuꞌnaꞌ

27Eeꞌnoko teketa nanuko Jiisuuꞌ kenaankai naninkai kaputuꞌkai bokurema siompuretuꞌ aaꞌpurema, “Pankaing, Deevitaꞌ bakanaving-koong, Piaamereaing neeꞌ!” 28Eeꞌnoko teketa niiꞌnava-koo tumparako tenaanka kaputuꞌka tee-anko poretuꞌ, eeꞌnoko Jiisuuꞌke niaꞌurema aaꞌpuretuꞌ tenaanka, “Deeꞌke ee ning makosi masikaꞌantameresi otong ninge piaroresinaꞌ nkorampeeꞌnaang?” Makuꞌurema aaꞌpuretuꞌ, “Eeꞌ, Ovoring.” 29Eeꞌnoko tenang teie beekaang duta kompurema aaꞌpuretuꞌ, “Deekaang baito-koo makosinaꞌ nkoaravaing deeꞌkoo.” 30Eeꞌnoko beekaang duta tenang bantouꞌ. Eeꞌnoko aaꞌnaꞌ orokovuretuꞌ aaꞌpurema, “Teka aung naninge noruꞌuaukaꞌ, makempereaing.” 31Teka tenaankai tee bereta Jiisuuꞌkoong doorenang bereng-antavuretuꞌ ootukunairu-koo temeensiꞌkooning-koo.

32Teketa napoꞌ tenkenaako niiꞌnung naning maꞌnaange korivuko karoarukoꞌnung Jiisuuꞌanko tavoꞌauꞌ. 33Eeꞌnoko tenang tee maꞌnaang bataꞌuioꞌ tee karoarukoꞌnung karouꞌ, eeꞌnoko nantoong karingai ooaara taꞌninaara aaꞌpauꞌ, “Kapooꞌ eeꞌ oroꞌ ooampiaruuꞌnung teroita niiꞌkoo Isireeli-nupoong-koo meuꞌka.” 34Teka teinge boto keperuuꞌnavitue aaꞌpauꞌ, “Tee aaꞌ maꞌnari biikaang pankaing bakaang iriꞌke teeꞌ bataꞌurimang maꞌnari.”

Jiisuuꞌke Bakaning Barevare-nupoong Mintoong-koo Botovuruꞌnaꞌ

(9:35–10:42)

Nantoong Mintoong-nupoong Okiꞌning

35Jiisuuꞌ tee teeꞌ nariꞌ osinankai pankenge eeꞌnoko okiꞌnarekaꞌke nanuuꞌ nau-antavurima biikaning pava dootuuꞌnanka-koo daankiarama, aaꞌnoma, tampara doorenang daankivuma tee muuꞌ paninung-koong eeꞌnoko siipananka amutemuriiꞌ taare-antavurima. 36Eeꞌnoko tenang teie teing nantoong karinga oovurira bakaang domang aaꞌnaꞌ piaavouꞌ teing ereananuka eeꞌnoko aruaruꞌnuka deempariri otorokoꞌnung-koo, teing-pinaꞌ sipisipiꞌ tanatanungropanuka-pinaꞌ oroꞌpariko. 37Teketa teing bakaning barevare-nupoong aaꞌpurikoꞌ, “Sinang tee bakei aaꞌnaꞌ meuraꞌpuing, teka kavuꞌnupoong okiꞌning. 38Teeꞌkoo kunsirariaing sinang kavuꞌkoo Ovoringe kavuꞌnupoong botovuriainaꞌ tee-koo bakaang mintoong-koo.”